📰 તાપીના સોનગઢમાં ટાપરવાડા ગામે નવી પ્રાથમિક શાળાનું લોકાર્પણ

ટ્રાઇબલ કિંગ : શ્રોતા, કિર્તનકુમાર ગામીત

સોનગઢ, તાપી:

તાપી જિલ્લાના સોનગઢ તાલુકાના ટાપરવાડા ગામે જિલ્લા પંચાયત શિક્ષણ સમિતિ-તાપી સંચાલિત નવી પ્રાથમિક શાળા, ‘પ્રાથમિક શાળા ટાપરવાડા’નું ભવ્ય લોકાર્પણ કરીને શાળાની શરૂઆત કરવામાં આવી છે.

આ પ્રસંગે આયોજિત કાર્યક્રમમાં તાપી જિલ્લા પંચાયત પ્રમુખ જાલમસિંગ વસાવા, તાપી જિલ્લાના માજી પ્રમુખ સુરજભાઈ વસાવા, પદ્મ શ્રી રમીલાબેન ગામીત (સામાજિક કાર્યકર્તા), તેમજ ગ્રામ પંચાયત સરપંચ એલિશાબેન એ. ગામીત અને ઉપ સરપંચ સુરેન્દ્રભાઈ ગામીત મુખ્ય મહેમાન તરીકે ઉપસ્થિત રહ્યા હતા.

આ ઉપરાંત, સોનગઢ તાલુકાના પ્રાથમિક શિક્ષણ વિભાગના અધિકારીઓ, ભુતપૂર્વ આચાર્ય રામજીભાઈ પટેલ અને મહિપાલ વાળા સાહેબની પણ સન્માનનીય હાજરી રહી હતી. લોકાર્પણ અને શાળા સ્થાપના દિવસના આ કાર્યક્રમમાં ગ્રામજનો અને વાલીગણની મોટી સંખ્યા જોવા મળી હતી.

નવી શાળાના લોકાર્પણ અને સ્થાપના દિવસના ભાગરૂપે, શાળાના બાળકો દ્વારા વિવિધ સાંસ્કૃતિક કાર્યક્રમો પણ રજૂ કરવામાં આવ્યા હતા, જેણે ઉપસ્થિત સૌ કોઈને મંત્રમુગ્ધ કર્યા હતા. આ નવી શાળા ટાપરવાડાના બાળકોના ઉજ્જવળ ભવિષ્ય માટે એક મહત્ત્વપૂર્ણ પગલું બની રહેશે.